«ҚСКҚ» ХАЛЫҚАРАЛЫҚ деңгейге шықты. 30 қыркүйекте Өзбекстан Салық кеңесшілер палатасымен ынтымақтастық туралы Меморандумға қол қойылды.

29 қыркүйектен 2 қазанға дейін Қазақстан салық консультанттары қауымдастығының делегациясы Өзбекстан Республикасына іссапармен барды. 

Сапардың басты мақсаты — Ташкент қаласында Өзбекстан Салық консультанттары палатасының басшылығы және мүшелерімен кездесіп, тәжірибе алмасу және салықтық кеңес беру саласында ынтымақтастық орнату.

Қазақстан тарапынан жаңа Салық кодексіндегі негізгі өзгерістер туралы шолу ұсынылып, оны қолданыстағы заңнама нормаларымен салыстыру жүргізілді. Сонымен қатар салықтық әкімшілендіру мен салық даулары бойынша әкімшілік әділет тәжірибесі жөніндегі тәжірибе бөлісілді.

Өзбекстандық әріптестер өз жүйелері туралы жан-жақты ақпарат берді:
— шағын бизнес пен өзін-өзі жұмыспен қамтығандар үшін салық салу ерекшеліктері;
— әлеуметтік сала мен ауыл шаруашылығындағы салықтық жеңілдіктер;
— камералдық бақылау, тексерулер жүргізу тәжірибесі және салық дауларын шешудің балама тетіктері.

Бұдан бөлек, салық консультанттарының қызметі және нормашығармашылық саласында тәжірибе алмасу өтті. Кездесу достық және сенімді атмосферада өтті — сұрақтар ашық қойылып, жауаптар барынша нақты әрі тиімді болды.

Сапардың нәтижесінде екі ұйым арасында өзара ынтымақтастық туралы меморандумға қол қойылды. Бұл құжат одан әрі кәсіби ынтымақтастық пен тұрақты тәжірибе алмасудың негізін қалады.